Rabu, 22 April 2009

PUISI BALI

DUKA

Rasa kampih
jiwane naktakin duka,
rasa semutan
deweke negen kasengsaran,
yadiastun galahe saling sautin ngelebang cerita
kemu-mai ngandong kita
nanging kenehe layu
kecekuk baan kelacuran
tusing nawang...
encen ane lakar kedakep...
encen ane lakar kegisi...
tur buwin..,
tusing taen tityang nemuang dewek pedidi.


DUKA

Idup manumadi dadi manusa
saja keweh kerasa,
tan lempas tekening siksa
tan lempas tekening duka,
di gumi sane sampun nyansan wayah
idupe kelara-lara
miribang...
nika makejang ulian dosa,
ane ipidan enu masisa
jani patut tebus di mercepada.


SELEM-PUTIH

Selem ocem,putih bungah,
selem peteng,putih lemah,
selem sebet,putih serdah,
selem jele,putih melah
selem-putih setata medampingan
dados simbul..
ruwa bineda ring jagate.


BIYANG

Potrekane megantung di bucu
masebeh kayu jati meukir
wantah rupa sane ngiasin kaca
luwih tur ngelangenin,

duh...biyang,
potrekane punika wantah ragan biyange
kenyem manis lan kadengan cenik di lambene
rambute selem kepusungan,

sane mangkin...
wantah potrekan sane kekutang
i biyang sampun ninggalin budal ke tanah wayah,
Tityang,I Aji,I Beli lan I Embok,
tan sida nanggehang sebet

rasa kangen di hatine
rikala nyingakin potrekan biyange
megantung bengong di temboke.


PUNYAH

Ulian tuak matane barak
ulian arak tingkahe merkak
yen abedik kal ngilangan congah
yening lebihan kal ngai ngutah
ulian tuak ane polos dadi galak
ulian arak ane kalem dadi begak
rasa kimude dadi pongah
laksanane kal ngendah-ngendah

sing ngitungan timpal apa buwin anak
nyak i bapa nyak i pekak
yening sing cocok jeg nagih nyakcak
yening baang tutur jeg nagih ninjak
setata mabekel basang bawak
pelih abedik jeg nagih mapak
negakin motor misi nunggah cara jaran ngedumplak
ngilut gas luwihan teken jalan nanjak
pangkung dalem katon asah
tukad linggah kaden natah

leneng nyamping jeg ingsak
punyan kayu ngoyong jeg tabrak
mental ngeliling melingeb-lungkayak
motor benyah,kulite telah babak
payu melingkuh slegak-slegak
tusing inget tekening awak
tegarang metakon ring manah
pelihe enyen ane ngelah...?

ulian tuak matane barak
ulian arak tingkahe merkak
yening abedik ngai anget tangkah
yening lebihan kal ngai punyah
ingening nginem tuak
pabedikin nginem arak apang sing ngutah, apang sing punyah
apang sida nemu sane kaucap melah

0 komentar:

Posting Komentar